Tum jaise gaye aese bhī jātā nahīñ koī

Rehne ko sadā deher meiñ āatā nahīñ koī

Tum jaise gaye aise bhī jātā nahīñ koī

Itqā kī maut ke bāad āaj ye ehsās huā kī mīsālī maut ke līye darkār hotā hai mīsālī zindagī jeena. Har qadam par ehtiyāt, niyyat meiñ khulūs aur amal meiñ istiqāmat isī ko taqwa kehte haiñ.

Bohot sāal pehle jab pehlī dafa milī to usne apne azm aur quwwate irādi ke bāre meiñ batayā thā. Batāyā thā kī kis tarāh bohot choti umr meiñ ek bāar jo usne duniyā ki chāhat chor kar Allah ki chāhat kī to phir kabhī palat kar duniyā hāsil karne ki koshish nahīñ kī. Hamāre liye Itqā us waqt ek misāl thī jab nihāyat haseen hone ke bawajūd khud ko is tarāh dhāñp liyā kartī thī ki koī ladkī bhi use nā dekh sake. Us waqt bhi ek misāl thī jab Urdu aur Arabi se na wāqif hone ke bāwajūd us ne 9 se 10 sāal lagā kar Qurāan ki tafseer padhī aur padhne ke bāad apnī jaisī ladkiyoñ ko Qura'an padhānā shurū kardiya. Yaad rahe ki aese shakhs kī jidd-o-johod us shakhs se kahīñ ziyada hotī hai jo Urdu ya Arabi ka ilm rakhtā ho, Allah ki nazar meīn bhi, aur mushkilāat ke aitabāar se bhī. Itqa hamāre liye us waqt bhi ek misāl banī jab us ne ye sikhāyā ki bā-salāhiyyat aur mazbūt kirdār ke bachhoñ ki tarbiyyat kaise kī jaātī hai. Aur āaj bhi ek misāal ban kar is duniyā se chali gayi jab apnī betī ki paidayish ke daurān usko shahādat naseeb ho gayī. Jis Allah ki chāhat ko dil meiñ liye duniyā meiñ ghumtī thī us Allah ne aaj uski zindagī ko Qubul karliya. 

A'amāl bhale hī sab ke qubūl hote hon, zindagiyāñ kisī-kisī ki qubūl hotī haiñ. Jis tarah maut bhale hī sab ko āatī ho, shahādat kisī-kisī ko naseeb hotī hai. Allah se dua'a hai ki us kī shahādat qubūl farmaye. Itqā ko Jannat meiñ behtreen maqām hāsil ho. Aameen!