Sahaspur ka Aatish khana aur Qura'an ki Ayat

Har garmi ki chutti meiñ Nanajaan ke ghar bachpan se aana hota raha hai. Yahan ke dar-o-deewaar, taaqoñ, aatish khaanoñ se to bachpan se hi mānūs haiñ magar hamari is baār ki visit ne hameiñ qura'an ki ek āyat samjhne ka mauqā diya. Jab dopeher ka khana khā kar ham sab lambe kamre meiñ lete the tab achānak meri nazar ek aatish khane pe padi jisko maiñ angrezi lafz niche (neesh) ke naam se jaanti thi. Maine Ammi se pucha kya ap ko pata hai isko kya kehte haiñ. Unhone jawab diya ise Aatish khaane ya taaq bhi kaha jata hai. Maine pucha in ko banane ka kya maqsad hota tha. Ammi ne kaha isme charaagh jala kar rakhe jaate the.. Maine kaha charaagh to mehez ek machan (slab) pe bhi rakhe jaa sakte the taaq banane ki kya wajah hogi. Mere baar baar puchne par bhi ammi ne ek hi jawab diya. Phir maine ammi ko bataya ki iske bāre meiñ maine Nauman Ali Khan se suna tha. Is ka zikr Qura'an ki surat Nūr meiñ aayā hai. Jahañ Allah taala farmāte haiñ ki Allah ke Nūr (hidayat) kis misaal aesi hai jaise ek aatish khaane meiñ ek raushan charaagh rakha hua ho, charagh ek fānūs (Glass) meiñ ho aur fānus aesa ho jaise moti (pearl) ki tarah chamakta hua taara.. Maine Ammi ko bataya ki Ustaz Nauman ne apne ek lecture series Striking Examples meiñ is taaq/aatish khane ko explain kiya hai aur bataya hai ki Allah ne Aatish khane ko momin ke dil se tashbeeh di hai.. Jaise ek taaq ke kuch fayde/maqasid hote haiñ usi tarah ek momin kuch faydoñ ka hāmil hota hai agar waqeatan imāan wala ho to un me se kuch haiñ: 

1. Rāste ki rukawat nahiñ banta: Ek charagh ko kahiñ bhi rakha ja sakta hai magar ek taaq meiñ rakhne se wo kisi ke liye khatra ya rāste ki rukāwat nahiñ banta. Momin agar waqeatan momin hai to us ke zaat se kisi ko koi khatra mehsūs nahi hoga. Is ke alawa taaq ki saakht aesi hoti hai ki jaise hi charaagh rakha jaye waise hi raushni meiñ izāfā ho jata hai aur pura kamra raushan ho jata hai. Momin ka dil ek taaq ki manind hona chahiye jis meiñ jab hidayat ki raushni dākhil ho to us ka aks pūre mahaul ko raushan karde.

2. Focused yaani yaksū hota hai: Ek taaq ki khūbi ye bhi hoti hai ki wo jis samt ke liye banaya gaya ho usī samt ko raushan kare. Baqi saari samtoñ ko andhere meiñ rakhe. Goya kamre ke jis taaq me charaagh rakha jaaye uski saamne waali saari chizein raushan ho jāti hain. Ye rakhne wale ki fauqiyyat (priority) par hai ki wo kis chiz pe raushni dālna chahta hai aur kis chiz ko andhere me rakhna chahta hai. Isi tarāh ek momin ka ye tarz-e-amal bilkul nahiñ hota ki wo duniya ke fuzūl rasm-o-riwāj, logon ki be buniyaad aur bemaqsad batoñ me bhi ghira rahe aur in sab ke saath reh kar ek bāmaqsad zindagi bhi basar kar sake. Kisi ek samt ko ikhtiyār kar ke dūsrī samt ko chorna uske liye zaroori hota hai. Kaun si samt ikhtiyār karnī hai aur kaun si chornī hai isi baat ka faisla hamāri zindagi ki fauqiyyaāt ko dikhata hai.

3. Madham raushni: Ek charagh jab taaq me rakha hua ho to us ki raushni ka aks deewār pe padke wapas ata hai jise ham angrezi meiñ reflection kehte hain. Reflection ki wajah se uski raushni phail kar halki ho jaati hai aur saare mahaul ko madham aur pur sukūn bana deti hai. Ye hi tareeqa-e-kār ek momin ka hota hai jis ke dil me waqeatan agar hidayat ki raushni ho to us ka dil sakht aur zubaan talkh nahi hoti balki dil narm hota hai. Wo tez raushni ki tarah chubhta nahiñ balki madham raushni ki tarah sukūn bakhshta hai.

Is tarah maine aur Ammi ne Qura'an ki ek ayat ka matlab samjha. 

-Shua Hayat